ज्ञानतीर्थ २०२६ युवक महोत्सवाचा आज समारोप
नांदेड: डॉ. प्रवीणकुमार सेलुकर
स्वामी रामानंद तीर्थ मराठवाडा विद्यापीठ आणि नांदेड एज्युकेशन सोसायटीचे सायन्स कॉलेज, नांदेड यांच्या संयुक्त विद्यमाने आयोजित ‘ज्ञानतीर्थ २०२६’ आंतर महाविद्यालयीन युवक महोत्सवातील कलामहोत्सवाचा समारोप व पारितोषिक वितरण समारंभ सोमवार, दि.१९ ऑक्टोबर, २०२६ रोजी सकाळी ११ वाजता साने गुरुजी मुख्य मंचावर होणार आहे. या सोहळ्याला प्रसिद्ध सिनेअभिनेते तथा सामाजिक कार्यकर्ते सयाजी शिंदे यांची प्रमुख उपस्थिती लाभणार असून, विविध कलाप्रकारांत उल्लेखनीय कामगिरी करणाऱ्या विद्यार्थी कलावंतांचा यावेळी गौरव करण्यात येणार आहे.
या समारंभाच्या अध्यक्षस्थानी स्वामी रामानंद तीर्थ मराठवाडा विद्यापीठाचे कुलगुरू डॉ. मनोहर चासकर राहणार आहेत. प्रमुख पाहुणे म्हणून प्रसिद्ध अभिनेते व सामाजिक कार्यकर्ते सयाजी शिंदे, नांदेडचे पोलीस अधीक्षक डॉ. निलाभ रोहन आणि विद्यापीठाचे प्र-कुलगुरू डॉ. अशोक महाजन उपस्थित राहणार आहेत. तसेच नांदेड एज्युकेशन सोसायटीचे उपाध्यक्ष अॅड. प्रफुल्ल अग्रवाल आणि सचिव सौ. शामल पत्की यांचीही प्रमुख उपस्थिती लाभणार आहे.
गेल्या तीन दिवसांपासून सुरू असलेल्या या युवक महोत्सवात विद्यार्थ्यांनी आपल्या कलागुणांचे प्रभावी सादरीकरण करत सांस्कृतिक वैभवाची अनोखी अनुभूती दिली. महाराष्ट्राच्या समृद्ध लोककला, नृत्य, नाट्य, संगीत, वाङ्मय आणि ललित कला अशा विविध कलाविभागांतर्गत पाच मंचांवर एकूण ३० कलाप्रकारांचे सादरीकरण करण्यात आले. विविध महाविद्यालयांतील विद्यार्थी कलावंतांनी उत्स्फूर्त सहभाग नोंदवत आपल्या प्रतिभेची आणि सर्जनशीलतेची झलक सादर केली.
विद्यार्थ्यांच्या कलागुणांना व्यासपीठ उपलब्ध करून देणे, त्यांच्या सर्जनशीलतेला प्रोत्साहन देणे आणि महाराष्ट्राच्या सांस्कृतिक परंपरेचे जतन व संवर्धन करणे, हा या युवक महोत्सवाचा प्रमुख उद्देश आहे. तीन दिवस रंगलेल्या या कलामहोत्सवाची सांगता मान्यवरांच्या उपस्थितीत होणार असून, विविध कलाप्रकारांमध्ये उत्कृष्ट कामगिरी करणाऱ्या विजेत्या विद्यार्थी कलावंतांना पारितोषिके देऊन सन्मानित करण्यात येणार आहे.
या समारोप व पारितोषिक वितरण समारंभास विद्यार्थी, प्राध्यापक, कलाप्रेमी आणि नागरिकांनी मोठ्या संख्येने उपस्थित राहावे, असे आवाहन महोत्सवाचे निमंत्रक तथा विद्यापीठाचे कुलसचिव डॉ. ज्ञानेश्वर पवार, सायन्स कॉलेजचे प्राचार्य डॉ. लक्ष्मण शिंदे, विद्यार्थी विकास विभागाचे संचालक डॉ. राजपालसिंह चिखलीकर आणि युवक महोत्सवाचे संयोजन सचिव डॉ. प्रशांत सुतकर यांनी केले आहे.
