दुष्काळाच्या पार्श्वभूमीवर डॉ. महेश मगर यांचा स्तुत्य निर्णय!
युवक महोत्सवातील प्रवास भत्ता, दैनिक भत्ता व मानधनाची संपूर्ण रक्कम विद्यार्थी सहाय्यता निधीस देणार
नांदेड : राज्यातील दुष्काळी परिस्थितीच्या पार्श्वभूमीवर सामाजिक बांधिलकी जपत स्वामी रामानंद तीर्थ मराठवाडा विद्यापीठाचे अधिसभा सदस्य डॉ. महेश मगर यांनी स्तुत्य निर्णय घेतला आहे. विद्यापीठाच्या युवक महोत्सवातील विविध उपक्रमांना उपस्थित राहिल्याबद्दल त्यांना मिळणारी प्रवास भत्ता, दैनिक भत्ता आणि मानधनाची संपूर्ण रक्कम विद्यार्थी सहाय्यता निधीकडे वर्ग करण्याची विनंती त्यांनी कुलगुरूंकडे केली आहे.
स्वामी रामानंद तीर्थ मराठवाडा विद्यापीठाचा युवक महोत्सव १६ ते १९ ऑक्टोबर २०२६ या कालावधीत सायन्स महाविद्यालयात आयोजित करण्यात आला आहे. या महोत्सवाच्या पार्श्वभूमीवर दुष्काळग्रस्त परिस्थितीचा विचार करून प्रवास भत्ता, दैनिक भत्ता आणि मानधनाच्या रकमेतून काही रक्कम सामाजिक उपक्रमासाठी देण्याचे आवाहन करण्यात आले आहे.
या आवाहनाला प्रतिसाद देत डॉ. महेश मगर यांनी केवळ काही रक्कम देण्याऐवजी आपल्याला मिळणारी संपूर्ण रक्कम विद्यार्थी सहाय्यता निधीकडे वर्ग करण्याचा निर्णय घेतला आहे. संबंधित रक्कम त्यांना प्रत्यक्ष देण्याऐवजी त्यांच्या नावावर जमा होणारी प्रस्तावित संपूर्ण रक्कम थेट विद्यार्थी सहाय्यता निधीत जमा करण्यात यावी, अशी विनंती त्यांनी १४ ऑक्टोबर रोजी कुलगुरूंना दिलेल्या निवेदनातून केली आहे.
दुष्काळाच्या काळात सामाजिक जाणिवेतून घेतलेल्या या निर्णयामुळे गरजू विद्यार्थ्यांना मदतीचा हात मिळण्यास हातभार लागणार आहे. विद्यापीठाच्या सामाजिक बांधिलकीच्या उपक्रमांना बळ देणारा हा निर्णय असून, इतरांनीही परिस्थितीचे गांभीर्य ओळखून सामाजिक कार्यासाठी पुढाकार घ्यावा, असा संदेश यातून मिळतो.
विद्यार्थ्यांच्या मदतीसाठी स्वतःच्या मानधनाचा त्याग करण्याची डॉ. महेश मगर यांची भूमिका सामाजिक संवेदनशीलतेचे उदाहरण ठरली आहे.
