मांडवी पोलिसांची मोठी कारवाई: पिंपळगाव फाटा शिवारात जुगार व मटका अड्ड्यावर धाड; १० जणांवर गुन्हे दाखल, १ लाखाचा मुद्देमाल जप्त
मांडवी (प्रतिनिधी ):
पिंपळगाव फाटा शिवारात बेकायदेशीरपणे चालणाऱ्या जुगार अड्ड्यावर आणि मटका चालवणाऱ्यांवर मांडवी पोलिसांनी धडक कारवाई केली आहे. या दोन वेगवेगळ्या कारवायांमध्ये पोलिसांनी एकूण १ लाख २४० रुपयांचा मुद्देमाल जप्त करत १० जणांविरुद्ध गुन्हे दाखल केले आहेत. पोलिसांच्या या धडक कारवाईमुळे परिसरातील अवैध धंदेवाल्यांचे चांगलेच धाबे दणाणले आहेत.
पहिली कारवाई: दत्तात्रय मंदिरासमोरील टेकडीवर जुगारावर धाड
पोलीस सूत्रांकडून मिळालेल्या माहितीनुसार, सहाय्यक पोलीस निरीक्षक (सपोनि) गंगाधर गायकवाड यांच्या मार्गदर्शनाखाली मिळालेल्या गुप्त माहितीच्या आधारे २४ जुलै रोजी सायंकाळी साडेसहा वाजेच्या सुमारास ही कारवाई करण्यात आली.
पिंपळगाव शिवारातील जंगलात असलेल्या दत्तात्रय मंदिरासमोरील टेकडीवर, लिंबाच्या झाडाखाली काही इसम ‘अंदर-बाहेर’ नावाचा पानांचा जुगार पैशांवर खेळवत व खेळत असल्याचे दिसून आले. माहिती मिळताच पोलीस उपनिरीक्षक मुरारी गायकवाड, पोलीस कॉन्स्टेबल मनीष ठाकरे, प्रकाश अस्वले , श्याम माने व अश्विना झाडे यांच्या पथकाने परिसराला वेढा घालून जुगार खेळणाऱ्यांना रंगेहात ताब्यात घेतले.
ताब्यात घेतलेले आरोपी:
१. ब्रह्मम रामलू सट्टाजीवार (रा. किनवट)
२. रोहन शंकर बेलसरवार (रा. किनवट)
३. अबरारखान सत्तार खान पठाण (रा. आदिलाबाद)
४. दयापाल राजू पाटील (रा. पिंपळगाव)
५. अशोक भिकाजी शेंडे (रा. पिंपळगाव)
६. भुराजी हरी चव्हाण (रा. तलाईगुडा)
७. रामकुमार आडेलू पांडेलवार (रा. अंबडी)
या आरोपींकडून नगदी रकमेसह ९०,२०० रुपयांचा मुद्देमाल जप्त करण्यात आला.
पकडलेल्या आरोपींकडे अधिक चौकशी केली असता, हा जुगार पिंपळगाव येथील देविदास राठोड आणि किरण नरवाडे हे दोघे भरवत व खेळवत असल्याचे निष्पन्न झाले. याप्रकरणी मुख्य आरोपी व पकडलेल्या ७ आरोपी अशा एकूण ९ जणांविरुद्ध महाराष्ट्र जुगार कायदा कलम १२(अ) अन्वये गुन्हा दाखल करण्यात आला आहे.
दुसरी कारवाई: व्हाट्सअ‍ॅपद्वारे चालणाऱ्या मटका अड्ड्याचा पर्दाफाश
दुसऱ्या घटनेत, २२ जुलै रोजी पिंपळगाव फाटा येथील चौकात एक इसम मोबाईलवर मटक्याचे आकडे घेऊन लोकांकडून पैसे उकळत असल्याची गुप्त माहिती पोलिसांना मिळाली.
पोलीस पथकाने तात्काळ कारवाई करत अमेश माणिक मडावी (रा. पळशी) याला ताब्यात घेतले. त्याच्या मोबाईलमधील व्हाट्सअ‍ॅप उघडून पाहिले असता, त्यात मटक्याचे आकडे व आर्थिक व्यवहार दिसून आले. पोलिसांनी त्याच्याकडून १०,०४० रुपयांचा मुद्देमाल व मोबाईल जप्त केला असून त्याच्याविरुद्धही गुन्हा दाखल करण्यात आला आहे.
या दोन्ही कारवायांमध्ये एकूण १,००,२४० रुपयांचा मुद्देमाल जप्त करण्यात आला आहे. मांडवी पोलीस ठाण्याच्या हद्दीत जुगार, मटका किंवा इतर कोणतेही बेकायदेशीर कृत्य चालवणाऱ्यांवर यापुढेही अशीच कडक आणि धडक कारवाई सुरू राहील. “अवैध धंदे करणाऱ्यांची कोणत्याही परिस्थितीत गय केली जाणार नाही,” असा स्पष्ट इशारा मांडवी पोलीस प्रशासनाकडून देण्यात आला आहे.
