नवीन नांदेड / प्रतिनिधी
नांदेड : स्वामी रामानंद तीर्थ मराठवाडा विद्यापीठाच्या वतीने आयोजित ‘ज्ञानतीर्थ २०२६’ आंतरमहाविद्यालयीन युवक महोत्सवात वसंतराव नाईक महाविद्यालय, वसर्णी (महाविद्यालय कोड : २६४७) येथील विद्यार्थ्यांनी पारंपरिक ‘गोंधळ’ या लोककला प्रकाराचे प्रभावी सादरीकरण करून उपस्थितांची मने जिंकली.
महोत्सवात महाविद्यालयाच्या विद्यार्थ्यांनी ‘अंबाबाई गोंधळा ये…’ या गोंधळगीताच्या तालावर सादर केलेल्या पारंपरिक लोककलेने उपस्थितांचे लक्ष वेधून घेतले. पारंपरिक वाद्यांची साथ, लोकगीतांचा ठेका, तालबद्ध नृत्य आणि शिस्तबद्ध सादरीकरण यांमुळे महाराष्ट्राच्या समृद्ध लोकपरंपरेचे दर्शन घडले. विद्यार्थ्यांच्या उत्स्फूर्त सादरीकरणाला उपस्थितांकडून उत्स्फूर्त प्रतिसाद मिळाला.
या सादरीकरणात साक्षी गंगाधर बेरजे, पल्लवी कैलास भालेराव, साक्षी दिलीप भालेराव, कोमल मनोज जोंधळे, रिया महेन्द्र पंडित, प्राजक्ता तुकाराम सावंत आणि सलोनी उमेश सोनसळे या विद्यार्थिनींनी सहभाग घेतला.
प्राचार्यांकडून अभिनंदन
विद्यार्थ्यांनी युवक महोत्सवात पारंपरिक लोककलेच्या माध्यमातून महाविद्यालयाची सांस्कृतिक ओळख अधोरेखित केल्याबद्दल महाविद्यालयाचे प्राचार्य डॉ. शेखर घुंगरवार यांनी सहभागी विद्यार्थिनी व मार्गदर्शकांचे अभिनंदन केले आणि त्यांच्या पुढील कलात्मक वाटचालीस शुभेच्छा दिल्या.
या संघाला मार्गदर्शन करण्यासाठी महाविद्यालयाचे सांस्कृतिक विभागप्रमुख तथा संघ व्यवस्थापक डॉ. साहेबराव शिंदे, प्रा. कविता हंबर्डे, डॉ. शोभा वाळूकर आणि डॉ. पंढरी गड्डपवार यांनी विशेष परिश्रम घेतले. यावेळी प्रा. नितीन मुंडलोड, प्रा. राहुल पडोळे आणि डॉ. राहुल सरोदे यांचीही विशेष उपस्थिती होती.
पारंपरिक लोककलेचे जतन आणि संवर्धन करत युवक महोत्सवात वसंतराव नाईक महाविद्यालयाच्या विद्यार्थिनींनी सादर केलेल्या गोंधळाने सांस्कृतिक परंपरेचा ठसा उमटवला. त्यांच्या या कलाविष्काराचे सर्वत्र कौतुक होत आहे.
