नांदेड : प्रतिनिधी
स्वामी रामानंद तीर्थ मराठवाडा विद्यापीठ आणि सायन्स कॉलेज, नांदेड यांच्या संयुक्त विद्यमाने आयोजित ‘ज्ञानतीर्थ २०२६’ आंतरमहाविद्यालयीन युवक महोत्सवात साने गुरुजी मंचावर लोकनृत्य आणि आदिवासी नृत्याच्या सादरीकरणाने महोत्सवात उत्साहाचे वातावरण निर्माण झाले. विविध महाविद्यालयांच्या संघांनी या नृत्यप्रकारांत सहभाग नोंदवत आपल्या कलागुणांचे प्रभावी दर्शन घडविले.
पारंपरिक वेशभूषा, तालबद्ध पदन्यास, आकर्षक नृत्याविष्कार आणि लोकसंस्कृतीचे दर्शन घडविणाऱ्या सादरीकरणांमुळे उपस्थितांचे लक्ष वेधले गेले. लोकनृत्य आणि आदिवासी नृत्याच्या माध्यमातून विविध समाजांच्या समृद्ध सांस्कृतिक परंपरा, रूढी आणि जीवनशैलीचे दर्शन घडले. सहभागी कलावंतांनी आपल्या सादरीकरणातून भारतीय लोककलेचा वारसा जपण्याचा संदेश दिला.
युवक महोत्सवाच्या माध्यमातून विद्यार्थ्यांना विविध कलाप्रकार सादर करण्याची संधी मिळत असून, त्यांच्या कलागुणांना प्रोत्साहन देण्याबरोबरच सांस्कृतिक वारशाचे संवर्धन करण्यासही मदत होत आहे. विविध महाविद्यालयांच्या संघांनी उत्स्फूर्त सहभाग नोंदविल्यामुळे साने गुरुजी मंचावर चैतन्यमय वातावरण निर्माण झाले.
यावेळी उपस्थित मान्यवरांनी कलावंतांच्या सादरीकरणाचा आनंद घेतला. ‘ज्ञानतीर्थ २०२६’ युवक महोत्सवातील विविध कलाप्रकारांमुळे विद्यार्थ्यांच्या कलात्मक प्रतिभेला व्यासपीठ मिळत असून, महोत्सवात सांस्कृतिक रंगत वाढत आहे.
