नांदेड : येथील यशवंत महाविद्यालय, नांदेड मधील हिंदी विभागाच्या माजी विभागप्रमुख डॉ. अनीता दिगंबर सिंह रावत यांचे रविवारी पहाटे चार वाजता आकस्मिक निधन झाले. त्यांच्या निधनाची वार्ता समजताच शैक्षणिक व साहित्यिक क्षेत्रात शोककळा पसरली आहे.
डॉ. रावत यांनी आपल्या दीर्घ आणि समर्पित सेवाकाळात प्राध्यापक व विभागप्रमुख म्हणून शैक्षणिक गुणवत्ता, संशोधनवृत्ती आणि साहित्यिक जाणीव यांना सातत्याने प्रोत्साहन दिले. त्यांच्या मार्गदर्शनामुळे विद्यार्थ्यांना स्वतःची प्रतिभा विकसित करण्याची प्रेरणा मिळाली. त्या केवळ अभ्यासक्रमापुरत्या मर्यादित अध्यापिका नव्हत्या, तर विद्यार्थ्यांमध्ये भाषा, साहित्य आणि जीवनमूल्यांची सखोल जाण निर्माण करणाऱ्या प्रेरणादायी गुरु होत्या.
आदर्श मार्गदर्शक म्हणून त्यांनी अनेक विद्यार्थ्यांच्या शैक्षणिक व वैयक्तिक जीवनाला दिशा दिली. संशोधक विद्यार्थ्यांसाठी त्या एक सक्षम आधारस्तंभ होत्या. त्यांच्या जिज्ञासांचे संयमाने निरसन करत त्या विद्यार्थ्यांना उत्कृष्टतेकडे वाटचाल करण्यास प्रेरित करत. त्यांचा स्नेहशील स्वभाव विद्यार्थ्यांना मातृत्वाची ऊब देणारा होता. त्या शिस्तप्रिय होत्या; मात्र त्यांची शिस्त कठोरतेवर नव्हे तर आत्मीयता, नैतिकता आणि मूल्यांवर आधारित होती.
आज त्या आपल्यात नसल्या तरी त्यांची स्मृती, विचार आणि त्यांनी घालून दिलेले आदर्श पुढील पिढ्यांना सतत प्रेरणा देत राहतील. त्यांचे जीवन शिक्षणनिष्ठा, समर्पण आणि मानवी संवेदनशीलतेचे उत्तम उदाहरण म्हणून स्मरणात राहील.
