नांदेड, दि. ११ फेब्रुवारी :– मुखेड तालुक्यातील हिब्बट, कोळगाव, धामणगाव, मोटरगा, धनज व जामखेड या गावांमध्ये आज दि. ११ फेब्रुवारी २०२६ रोजी दुपारी सुमारे ३.२५ वाजता भूगर्भातून आवाज येऊन जमीन हलल्याची माहिती आहे.
राष्ट्रीय भूकंप विज्ञान केंद्राच्या संकेतस्थळानुसार दुपारी १५:२० वाजता रिश्टर स्केलवर ३.० तीव्रतेचा भूकंप नोंदविण्यात आला असून त्याचा केंद्रबिंदू मुखेड तालुक्यातील खपराळ गावाजवळ असल्याचे स्पष्ट झाले आहे.
हा धक्का अतिसौम्य स्वरूपाचा असून कोणतीही जीवित अथवा वित्तहानी झालेली नसल्याची माहिती तहसीलदार, मुखेड यांनी जिल्हा आपत्कालीन कार्यकेंद्रास दिली आहे.
या घटनेची दखल घेत जिल्ह्याचे पालकमंत्री अतुल सावे हे प्रशासनाच्या सतत संपर्कात असून संपूर्ण परिस्थितीवर लक्ष ठेवून आहेत. त्यांनी नागरिकांच्या सुरक्षिततेसाठी आवश्यक त्या सर्व उपाययोजना करण्याच्या सूचना संबंधित यंत्रणांना दिल्या.
००००००
