नांदेड, दि. २४ मार्च २०२६ — शहरात काही दुचाकी चालकांकडून अनधिकृतरीत्या बदल केलेले ‘फटाका सायलेंसर’ बसवून मोठ्या आवाजात हुल्लडबाजी केली जात असल्याचे निदर्शनास आल्यानंतर नांदेड पोलीस प्रशासनाने कडक कारवाई करत विशेष मोहीम राबवली.
या मोहिमेदरम्यान एकूण ८४ मोटरसायकलींवर कंपनीने मान्य न केलेले सायलेंसर आढळून आले. संबंधित वाहनांची तपासणी करून हे सर्व ८४ सायलेंसर जप्त करण्यात आले असून वाहनचालकांवर दंडात्मक कारवाई करण्यात आली आहे.
जप्त केलेले सायलेंसर मंगळवारी (दि. २४ मार्च) सायंकाळी ४.०० ते ४.३० या वेळेत महावीर चौक, नांदेड येथे रोड रोलरच्या साहाय्याने नष्ट करण्यात आले. या कारवाईमुळे शहरातील ध्वनीप्रदूषणावर आळा बसण्यास मदत होणार असल्याचे पोलीस प्रशासनाने सांगितले.
पोलीसांनी नागरिकांना आवाहन केले आहे की, वाहनांमध्ये केवळ कंपनीने दिलेल्या मानकांनुसारच सायलेंसर वापरावेत व कायद्याचे पालन करावे. अनधिकृत सायलेंसर वापरणाऱ्यांविरोधात पुढेही सातत्याने कारवाई केली जाणार असल्याचे स्पष्ट करण्यात आले.
ही मोहीम पोलीस अधीक्षक अभिनाश कुमार आणि अपर पोलीस अधीक्षक सुरज गुरव यांच्या मार्गदर्शनाखाली पार पडली. उपविभागीय पोलीस अधिकारी रामेश्वर वेंजन, श्याम पानेगांवकर, तसेच स्थानिक गुन्हे शाखा व शहर वाहतूक शाखेच्या अधिकाऱ्यांनी या कारवाईत सहभाग घेतला.
