आर्यनचे जीवन क्षेत्र पुनर्संचयित करणाऱ्या प्रकल्पावर संशोधन

नांदेड (प्रतिनिधी) :
आर्यन चंद्रकांत देवसरकर हा इयत्ता सहावी मध्ये शिक्षण घेत असून त्याने अत्यंत प्रतिष्ठेची समजली जाणारी डॉ होमी भाभा बालवैज्ञानिक या परीक्षेचे 2 टप्पे पूर्ण केल्यानंतर त्याची प्रकल्प सादरीकरणासाठी मुंबई येथे निवड झालेली आहे.

त्याने Restoring the Zone of Life या विषयावर प्रकल्प सादरीकरण केले आहे
वाढते औद्योगिकीकरण, शहरीकरण आणि मानवी हस्तक्षेप यामुळे पर्यावरणातील संतुलन बिघडत असून हवा व जल प्रदूषणाची समस्या गंभीर बनत आहे. या पार्श्वभूमीवर नांदेड शहरातील ऑक्सफर्ड इंटरनॅशनल स्कूल वाडी बु (Oxford International school Wadi (bk), Nanded) या शाळेतील इयत्ता ६ वीतील विद्यार्थी आर्यन चंद्रकांत देवसरकर यांनी ‘Restoring the Zone of Life’ या विषयावर संशोधनपर माहिती सादर केली आहे. आर्यनने जीवन क्षेत्र पुनर्संचयित करण्यासाठी आवश्यक उपाययोजनांचा सखोल अभ्यास केला आहे.

‘झोन ऑफ लाइफ’ म्हणजे मानव, प्राणी, वनस्पती आणि सूक्ष्मजीव यांचे संतुलित सहअस्तित्व असलेले पर्यावरणीय क्षेत्र. औद्योगिक धूर, रासायनिक सांडपाणी, प्लास्टिक कचरा आणि झपाट्याने होणारी वृक्षतोड यामुळे हे जीवन क्षेत्र धोक्यात आले आहे. परिणामी हवामान बदल, जलस्रोतांचे प्रदूषण आणि जैवविविधतेत घट दिसून येत आहे.

आर्यनच्या संशोधनानुसार, जीवन क्षेत्र पुनर्संचयित करण्यासाठी खालील उपाय महत्त्वाचे आहेत—

औद्योगिक सांडपाण्याचे शुद्धीकरण व पुनर्वापर

सौर व पवन ऊर्जेसारख्या स्वच्छ ऊर्जेचा वापर

जलसंधारण व पावसाचे पाणी साठवण

मोठ्या प्रमाणावर वृक्षारोपण आणि स्थानिक प्रजातींचे संवर्धन

नागरिकांमध्ये पर्यावरण जनजागृती

या उपाययोजनांमुळे हवा व पाण्याची गुणवत्ता सुधारून नैसर्गिक परिसंस्था पुन्हा सशक्त होऊ शकते, असे त्याने नमूद केले आहे. लहान वयातच पर्यावरण संरक्षणाचा विचार मांडत आर्यनने समाजासमोर जबाबदार नागरिकत्वाचा आदर्श ठेवला आहे.