नांदेड :
नेट-सेट व पीएच. डी. धारक संघर्ष समितीच्या वतीने विविध मागण्यांसाठी सोमवार, दि. २६ ऑक्टोबर रोजी नांदेड येथील उच्च शिक्षण सहसंचालक कार्यालयासमोर एकदिवसीय धरणे आंदोलन करण्यात आले. यावेळी तासिका तत्त्वावरील (सी.एच.बी.) नियुक्ती धोरण बंद करावे, प्राध्यापक भरती प्रक्रिया पारदर्शक व गतिमान करावी आणि प्रलंबित मानधन दिवाळीपूर्वी अदा करावे, अशा प्रमुख मागण्या करण्यात आल्या.
विद्यापीठ अनुदान आयोगाच्या निर्देशांनुसार समान कामासाठी समान वेतन लागू करावे, तासिका तत्त्वावरील नियुक्त्यां ऐवजी एकत्रित वेतनावर कंत्राटी पद्धतीने नियुक्त्या कराव्यात, प्राध्यापक भरती प्रक्रिया भ्रष्टाचारमुक्त, पारदर्शक व गतिमान करून पूर्ण करावी, तसेच राष्ट्रीय शैक्षणिक धोरण २०२० नुसार कार्यभार मोजणी बाबत शासन निर्णय निर्गमित करावा, या मागण्यांचाही आंदोलनात समावेश होता.
याशिवाय, राज्यातील तासिका तत्त्वावरील प्राध्यापकांचे प्रलंबित मानधन दिवाळीपूर्वी अदा करावे, अशी मागणी करण्यात आली. या मागण्यांचे निवेदन उच्च शिक्षण सहसंचालक डॉ. बाबासाहेब भोसले यांना देण्यात आले.
या आंदोलनात डॉ. परमेश्वर पौळ, डॉ. राजेश कुंटूरकर, डॉ. भारत कचरे, डॉ. बाबू गिरी, डॉ. जीवन चव्हाण, डॉ. शिवाजी शिंदे, प्रा. नितीन मुंडलोड, प्रा. प्रबुद्ध चित्ते, डॉ. निरंजन गिरी, डॉ. जाधव ए.जी., डॉ. अर्जुन मोरे , डॉ. व्यंकटी जाधव आणि डॉ. भीमराव घोडके यांच्यासह समितीचे पदाधिकारी व सदस्य उपस्थित होते.
दरम्यान, सिनेट सदस्य डॉ. ए. टी. शिंदे आणि डॉ. महेश मगर यांनी आंदोलनस्थळी भेट देऊन आंदोलनकर्त्यांशी संवाद साधला.
चौकट:
दिवाळी पूर्वी मानधन देण्याचे सहसंचालक यांनी मान्य केले तर इतर मागण्या धोरणात्मक असल्याने त्या सहसंचालक कार्यालयातून शिक्षण संचालक, उच्च शिक्षण महाराष्ट्र राज्य पुणे यांना सादर केल्या आहेत. संघर्ष समिती राहिलेल्या मागण्यांवर ठाम असून पुढील काळात ती राज्यव्यापी आंदोलनासह न्यायालयीन लढा उभा करणार आहे.
प्रा. डॉ. राजेश्वर कुंटूरकर
(राज्य समन्वयक, नेट-सेट व पीएच. डी. धारक संघर्ष समिती, महाराष्ट्र राज्य.)
