नांदेड, दि. ३ जून : स्वामी रामानंद तीर्थ मराठवाडा विद्यापीठाच्या संशोधन व मान्यता समिती (आर.आर.सी.) बैठकीसाठी संशोधनासंदर्भातील विविध प्रस्ताव सादर करण्याची मुदत २० जून २०२६ पर्यंत वाढविण्यात आली आहे. या मुदतवाढीसाठी संशोधक विद्यार्थी आणि मार्गदर्शक प्राध्यापकांच्या वतीने डॉ. महेश मगर यांनी विद्यापीठाचे कुलगुरू यांना निवेदन देऊन पाठपुरावा केला होता. त्यांच्या प्रयत्नांना अखेर यश आले असून विद्यापीठ प्रशासनाने मुदतवाढ जाहीर केली आहे.
विद्यापीठाच्या पदव्युत्तर विभागाने जारी केलेल्या परिपत्रकानुसार विविध विषयांच्या आरआरसी बैठका लवकरच आयोजित करण्यात येणार आहेत. यासाठी पीजी टीचर मान्यता, मार्गदर्शक मान्यता, संशोधन आराखडा, अंतिम शोध सारांश, विषय बदल, सहमार्गदर्शक नोंदणी रद्द करणे, मुदतवाढ आदी विविध प्रस्ताव पूर्वी ५ जून २०२६ पर्यंत सादर करण्याचे निर्देश देण्यात आले होते.
मात्र संशोधक विद्यार्थी व मार्गदर्शक प्राध्यापकांना आवश्यक कागदपत्रे पूर्ण करण्यासाठी अधिक वेळ मिळावा, या मागणीसाठी डॉ. महेश मगर यांनी कुलगुरूंना निवेदन सादर केले होते. त्यानुसार विद्यापीठ प्रशासनाने प्रस्ताव सादर करण्याची अंतिम मुदत २० जून २०२६ पर्यंत वाढविली आहे.
वाढीव मुदतीत प्राप्त होणारे सर्व प्रस्ताव आगामी आरआरसी बैठकीत विचारार्थ ठेवण्यात येणार असून विद्याशाखानिहाय व विषयनिहाय बैठकींचे सविस्तर वेळापत्रक लवकरच विद्यापीठाच्या संकेतस्थळावर प्रसिद्ध करण्यात येणार असल्याची माहिती पदव्युत्तर विभागाने दिली आहे.
या निर्णयामुळे संशोधक विद्यार्थी, पीएच.डी. अभ्यासक आणि मार्गदर्शक प्राध्यापकांना मोठा दिलासा मिळाला असून डॉ. महेश मगर यांच्या पाठपुराव्याबद्दल संशोधन क्षेत्रातील विद्यार्थ्यांनी समाधान व्यक्त केले आहे.
