नांदेड, दि. २७ : यशवंतराव चव्हाण महाराष्ट्र मुक्त विद्यापीठ, विभागीय केंद्र नांदेड व युवाशक्ती फाउंडेशन यांच्या संयुक्त विद्यमाने आयोजित करण्यात आलेल्या भव्य रोजगार मेळाव्यास उत्स्फूर्त प्रतिसाद मिळाला. या मेळाव्यात शेकडो बेरोजगार युवक-युवतींना महाराष्ट्रातील नामांकित तसेच आंतरराष्ट्रीय कंपन्यांमध्ये नोकरीच्या संधी उपलब्ध करून देण्यात आल्या.
या मेळाव्यासाठी सुमारे १३०० विद्यार्थ्यांनी ऑनलाइन नोंदणी केली होती. पुणे, मुंबई, नाशिक, नागपूर, अमरावती, रांजणगाव आदी औद्योगिक शहरांतील सुमारे ३५ प्रतिष्ठित कंपन्यांनी सहभाग नोंदवला. मुलाखतीत पात्र ठरलेल्या अनेक उमेदवारांना कंपन्यांकडून तात्काळ नियुक्तीपत्रेही देण्यात आली.
कार्यक्रमास विद्यापीठाच्या ग्रामीण विकास व उद्योजकता विद्याशाखेचे संचालक प्रा. कैलास मोरे, युवाशक्ती फाउंडेशनचे संचालक डॉ. सतीश पवार, झोनल मॅनेजर आनंद मिरगे, नांदेड विभागीय केंद्राचे वरिष्ठ शैक्षणिक सल्लागार डॉ. यशवंत कलेपवार तसेच छत्रपती संभाजीनगर येथील वरिष्ठ शैक्षणिक सल्लागार डॉ. नंदकुमार राठी आदी मान्यवर उपस्थित होते.
मुक्त विद्यापीठाच्या वतीने राज्यभरात आतापर्यंत एकूण ११ रोजगार मेळावे आयोजित करण्यात आले असून सुमारे २३ हजार विद्यार्थ्यांनी नोंदणी केली आहे. त्यापैकी सुमारे १२०० बेरोजगार युवकांना विविध कंपन्यांमध्ये रोजगाराच्या संधी उपलब्ध करून देण्यात आल्याची माहिती आयोजकांनी दिली. पुढील काळातही राज्यभर टप्प्याटप्प्याने रोजगारविषयक कार्यशाळा व मेळावे आयोजित करण्यात येणार असल्याचे सांगण्यात आले.
मेळावा यशस्वी करण्यासाठी विभागीय केंद्रातील दिलीप थोरात, डॉ. दिग्विजय देशमुख, विकास पावडे, नितेश देशमाने, राजू खरपडे, सुरज गायकवाड, माधव वैद्य, अक्षय गिरे, मुंजाजी कदम, गजानन कोकाटे, शिवानंद गिरे, भावेश देशमुख आदींनी परिश्रम घेतले.
कार्यक्रमाचे सूत्रसंचालन प्रा. गजानन इंगोले यांनी केले, तर आभार प्रदर्शन राजू खरपडे यांनी मानले.
