परभणी: शांतीनगर, येथील सुयोग इंग्लिश स्कूलमध्ये स्वातंत्र्य दिन उत्साहात साजरा करण्यात आला. यावेळी कार्यक्रमाचे अध्यक्ष प्रा. डॉ. ज्ञानोबा मुंढे यांच्या हस्ते ध्वजारोहण करण्यात आले. या प्रसंगी संस्थेच्या कोषाध्यक्ष सौ.पुष्पा मुंढे यांची उपस्थिती होती. कार्यक्रमादरम्यान विद्यार्थ्यांनी देशभक्तीपर गीतावर बहारदार समूह नृत्य सादर करून उपस्थितांची मन जिंकली. तसेच काही मुलांनी थोर पुरुषांच्या वेशभूषेत येऊन एकात्मतेचा संदेश दिला. तसेच काही विद्यार्थ्यांनी आपल्या कलेतून तिरंगा झेंडा विषयी माहिती सादर केली. कार्यक्रमाचे प्रास्ताविक प्रताप संदलापूरकर यांनी केले. अध्यक्षीय भाषणात प्रा. डॉ. ज्ञानोबा मुंढे यांनी स्वातंत्र्यवीरांना स्मरून त्यांच्या कार्याविषयी माहिती दिली. त्याचबरोबर आपल्या देशाला स्वातंत्र्य मिळवून देण्यासाठी स्वातंत्र्यवीरांच्या प्राणांच्या आहुतीनंतर इंग्रजांच्या गुलामगिरीतून मुक्त झालेल्या भारत मातेने मोकळा श्वास घेतला त्याचमुळे अनेक स्वातंत्र्यवीरांना स्मरून हा दिवस देशभरात आनंदाने साजरा केला जातो असे प्रतिपादन त्यांनी केले.
कार्यक्रमाचे सूत्रसंचालन सौ अंजली झरकर यांनी केले तर आभार सुचिता सोनुने यांनी मानले. कार्यक्रम यशस्वीतेसाठी शुभम पाठक, सुकन्या मरगळ, जयश्री छानवाल,हिराबाई बोरकर, संगीता श्रॉफ आदींनी प्रयत्न केले.
