नांदेड:
स्वामी रामानंद तीर्थ मराठवाडा विद्यापीठ येथे सोमवार, दि. २३ मार्च, २०२६ रोजी ‘शहीद दिन’ साजरा करण्यात आला. विद्यापीठाच्या प्रशासकीय इमारतीतील स्वागत कक्षात आयोजित कार्यक्रमात शहीद भगतसिंग, राजगुरू आणि सुखदेव या महान क्रांतिकारकांच्या स्मृतींना अभिवादन करण्यात आले.
कार्यक्रमाच्या प्रारंभी प्र-कुलगुरू डॉ. अशोक महाजन यांच्या हस्ते शहीदांच्या प्रतिमांना पुष्पहार अर्पण करून विनम्र श्रद्धांजली वाहण्यात आली. यावेळी विद्यापीठातील विविध विभागांचे प्रमुख व अधिकारी मोठ्या संख्येने उपस्थित होते. यामध्ये अधिष्ठाता डॉ. एम. के. पाटील व डॉ. पराग खडके, परीक्षा व मूल्यमापन मंडळाचे संचालक हुशारसिंग साबळे, वित्त व लेखाधिकारी डॉ. राजेश शिंदे, नवोपक्रम व नवसंशोधन संचालक डॉ. शैलेश वाढेर, विद्यार्थी विकास विभागाचे संचालक डॉ. राजपालसिंग चिखलीकर तसेच रासेयो संचालक डॉ. मारुती गायकवाड यांचा समावेश होता. याशिवाय उपकुलसचिव डॉ. रवि सरोदे, कार्यकारी अभियंता तानाजी हुस्सेकर, तुकाराम भुरके, अनिरुद्ध राहेगांकर, जनसंपर्क अधिकारी डॉ. अशोक कदम, अरुण धाकडे आणि डॉ. सुरेखा मुंगल यांचीही उपस्थिती होती.
प्रशासकीय अधिकाऱ्यांसह विद्यापीठातील प्राध्यापक, कर्मचारी आणि विद्यार्थ्यांनी शहीद भगतसिंग, राजगुरू आणि सुखदेव यांच्या प्रतिमांना पुष्प अर्पण करून अभिवादन केले.
———————————
