*
नांदेड : स्वामी रामानंद तीर्थ मराठवाडा विद्यापीठातील माध्यमशास्त्र संकुलाच्या कॅम्पस फिल्म क्लब आणि फेडरेशन ऑफ फिल्म सोसायटीज ऑफ इंडिया यांच्या संयुक्त विद्यमाने तिबेटियन चित्रपट ‘द कप’ (The Cup) चे प्रदर्शन करण्यात आले. खेन्त्से नॉर्बू दिग्दर्शित या जागतिक स्तरावर गाजलेल्या चित्रपटाचा विद्यार्थ्यांनी आस्वाद घेतला आणि प्रदर्शनानंतर चित्रपटाच्या आशय व चित्रभाषेवर चर्चा केली.
कार्यक्रमाचे प्रास्ताविक माध्यमशास्त्र संकुलाचे संचालक प्रा. डॉ. सुहास पाठक यांनी केले. कॅम्पस फिल्म क्लबच्या उपक्रमाविषयी डॉ. राजेंद्र गोणारकर यांनी माहिती दिली. जागतिक दर्जाचे अभिजात व आशयसमृद्ध चित्रपट विद्यार्थ्यांना पाहता यावेत आणि त्यांच्यात चित्रपटाकडे चिकित्सक व कलात्मक दृष्टीने पाहण्याची जाण विकसित व्हावी, या उद्देशाने संकुलात मागील काही वर्षांपासून नियमितपणे चित्रपट प्रदर्शन व त्यावरील चर्चेचा उपक्रम राबविण्यात येत असल्याचे त्यांनी सांगितले.
हिमालयाच्या कुशीत असलेल्या एका तिबेटियन बौद्ध मठाच्या पार्श्वभूमीवर ‘द कप’ची कथा आकार घेते. फुटबॉलचे विलक्षण वेड असलेल्या ऑर्ग्येन या लहान भिक्षूची ही गोष्ट आहे. आधुनिक जगाचे आकर्षण आणि मठातील पारंपरिक जीवन यांचा अत्यंत तरल व प्रसन्न संघर्ष चित्रपटातून उलगडत जातो. इतरांच्या आनंदासाठी आपल्या सर्वोच्च आनंदाचाही त्याग करणे हीच खरी मानवता, हा चित्रपटातून अधोरेखित होणारा संदेश विद्यार्थ्यांना विशेष भावला.
चित्रपट प्रदर्शनानंतर झालेल्या चर्चेत इंग्रजी साहित्याच्या अभ्यासक व कवयित्री डॉ. योगिनी सातारकर यांनी विद्यार्थ्यांशी संवाद साधला. चित्रपटाकडे केवळ मनोरंजन म्हणून न पाहता त्याची कथा, पात्रे, दृश्यभाषा, सांस्कृतिक संदर्भ आणि अंतर्निहित आशय समजून घेण्याची दृष्टी विकसित करणे आवश्यक असल्याचे त्यांनी सांगितले. चित्रपटातील विविध प्रसंगांचे विश्लेषण करत त्यांनी **‘द कप’**ची बलस्थाने उलगडून दाखवली.
यावेळी डॉ. शैलजा वाडीकर, डॉ. सचिन नरंगले यांच्यासह माध्यमशास्त्र संकुलातील विद्यार्थी-विद्यार्थिनी मोठ्या संख्येने उपस्थित होते.
