काँग्रेसचा गड भाजपच्या निशाण्यावर; नांदेडमध्ये स्थानिक स्वराज्य निवडणुकीची रंगत वाढली
दि. १४ नांदेड (उपसंपादक:सतीश वागरे) ; जिल्ह्यातील स्थानिक स्वराज्य संस्थांच्या आगामी निवडणुका चांगल्याच रंगात आल्या असून, राजकीय समीकरणे झपाट्याने बदलू लागली आहेत. अनेक वर्षांपासून काँग्रेसचा मजबूत गड मानल्या जाणाऱ्या नांदेडकडे आता भाजपने आपले लक्ष्य केंद्रित केले आहे. त्यामुळे येत्या निवडणुका काँग्रेस विरुद्ध भाजप अशी थेट लढत ठरण्याची चिन्हे दिसू लागली आहेत.
काँग्रेसच्या राजकारणात माजी मुख्यमंत्री अशोक चव्हाण हे नांदेडचे प्रमुख चेहरा होते. त्यांच्या प्रभावामुळे महापालिका, नगरपरिषद आणि जिल्हा परिषदांमध्ये काँग्रेसचे वर्चस्व अनेक वर्ष टिकून राहिले. मात्र त्यांच्या अनुपस्थितीमुळे काँग्रेससमोर आता नेतृत्वाचा प्रश्न निर्माण झाला आहे. “चव्हाण युगानंतरचा काँग्रेसचा चेहरा कोण?” हा प्रश्न काँग्रेसच्या गोटात ऐरणीवर आला आहे.
दुसरीकडे, भाजपने नांदेडमध्ये संघटनात्मक ताकद वाढविण्याचे मोहिमेसारखे काम सुरू केले आहे. अनेक माजी नगरसेवक, स्थानिक नेते आणि काँग्रेसमधून नाराज कार्यकर्ते भाजपमध्ये दाखल झाले आहेत. नव्या नेतृत्वाला वाव देत, भाजपने “नव्या चेहऱ्यांचा प्रयोग” करण्याचा निर्णय घेतला आहे. त्यामुळे काँग्रेससमोर कठीण आव्हान उभे राहिले आहे.
नांदेडच्या राजकारणात जातीय आणि स्थानिक समीकरणे महत्त्वाची भूमिका बजावत असतात. भाजपने या वेळी नव्या सामाजिक समीकरणांच्या माध्यमातून काँग्रेसचा गड भेदण्याची रणनीती आखली आहे. त्यातच, काँग्रेसमध्ये असलेल्या अंतर्गत नाराजी आणि गटबाजीमुळे परिस्थिती आणखी गुंतागुंतीची बनली आहे.
पारंपरिक मतदारवर्ग आजही काँग्रेससोबत असला तरी, पक्षातील नेतृत्वशून्यता आणि कार्यकर्त्यांमधील अस्वस्थता यामुळे काँग्रेसची अडचण वाढली आहे. जुन्या कार्यकर्त्यांना बाजूला ठेवून नव्या चेहऱ्यांना प्राधान्य दिल्याने पक्षात असंतोष वाढला आहे.
एकूणच, नांदेडमधील स्थानिक स्वराज्य निवडणुकीकडे राज्याचे राजकारण डोळे लावून बसले आहे. काँग्रेसचा गड टिकणार का, की भाजप तो भेदून नवा इतिहास रचणार? हे येत्या काही आठवड्यांत स्पष्ट होईल. मात्र इतके नक्की नांदेडची लढत या वेळी केवळ स्थानिक न राहता, राज्य पातळीवरील राजकीय शक्ती-परीक्षा ठरणार आहे.
