विद्यार्थ्यांच्या दप्तराचे वजन मर्यादित ठेवण्याचे शासनाचे निर्देश

दि. १३, नांदेड — (उपसंपादक सतीश वागरे)
महाराष्ट्र शासनाच्या शालेय शिक्षण व क्रीडा विभागाने विद्यार्थ्यांच्या शारीरिक तसेच मानसिक आरोग्याच्या दृष्टीने एक महत्त्वपूर्ण निर्णय घेतला आहे. “विद्यार्थ्यांच्या दप्तराचे वजन मर्यादित ठेवण्याबाबत” शासनाने नवीन मार्गदर्शक तत्त्वे जाहीर केली असून, यानुसार विद्यार्थ्यांच्या शाळेच्या बॅगचे वजन त्यांच्या शरीराच्या वजनाच्या १० टक्क्यांपेक्षा जास्त नसावे, असे स्पष्ट करण्यात आले आहे.

शासनाच्या या निर्णयानुसार प्रत्येक शाळेने विषयवार वेळापत्रक तयार करून त्या दिवशी आवश्यक तेवढीच पुस्तके व वह्या विद्यार्थ्यांकडून आणाव्यात, अशी सक्त सूचना देण्यात आली आहे. शिक्षक आणि पालकांनीही या नियमांचे पालन सुनिश्चित करावे, तसेच विद्यार्थ्यांनी अनावश्यक पुस्तके, वह्या व साहित्य शाळेत न आणण्याची काळजी घ्यावी, असे निर्देश देण्यात आले आहेत.

तसेच शाळांनी विद्यार्थ्यांकडून भारी पाण्याच्या बाटल्या, मोठे डबे किंवा अवजड बॅग वापरणे टाळावे, अशी सूचना शासनाने केली आहे. विद्यार्थ्यांच्या आरोग्याचे रक्षण आणि शिक्षण अधिक सुसह्य करण्यासाठी हा निर्णय अत्यंत आवश्यक असल्याचे शिक्षण विभागाने स्पष्ट केले आहे.

.

याशिवाय, शैक्षणिक निरीक्षक आणि शिक्षणाधिकारी यांनी दर सहा महिन्यांनी शाळांची तपासणी करून विद्यार्थ्यांच्या बॅगचे वजन नियमानुसार आहे की नाही, याचा अहवाल घेण्याचे आदेशही शासनाने दिले आहेत.

या निर्णयामुळे विद्यार्थ्यांच्या खांद्यावरील ओझे कमी होऊन त्यांचा शैक्षणिक अनुभव अधिक आनंददायी व आरोग्यदायी होईल, अशी अपेक्षा शिक्षण क्षेत्रातून व्यक्त केली जात आहे.